Búgin beınekonferensıa formatynda UQSHU parlamenttik Assambleıasynyń otyrysy ótip, onda Qazaqstan prezıdenti Qasym-Jomart Kemeluly Toqaevtyń bitimgershilik máseleleri boıynsha UQSHU Bas hatshysy arnaıy ókiliniń ınstıtýtyn qurý týraly bastamasy talqylandy, dep habarlady májilistiń baspasóz qyzmeti.

Otyrysta sóz sóılegen májilis tóraǵasy Nurlan Nyǵmatýlın atap ótkendeı, Qazaqstan jahandyq jáne aımaqtyq deńgeıdegi ózekti máselelerdi sheshý úshin halyqaralyq ózara is-qımyldy odan ári tereńdetýge jáne nyǵaıtýǵa nıetti. Sebebi qazirgi ýaqytta aımaqtyq qaýipsizdik taqyrybynyń ózektiligi burynǵydan da arta túsken.

Májilis spıkeri sondaı-aq UQSHU uıymynyń bitimgershilik áleýetin damytýdyń mańyzyna da basa nazar aýdardy. Osy rette Qazaqstan prezıdenti Qasym-Jomart Kemeluly Toqaevtyń bitimgershilik máseleleri boıynsha UQSHU Bas hatshysy arnaıy ókiliniń ınstıtýtyn qurý týraly bastamasyn júzege asyrý uıymnyń BUU-ǵa tıisti qurylymdarymen ózara is-qımyl múmkindigin keńeıtetindigin alǵa tarta kele Nurlan Nyǵmatýlın osy saladaǵy ózekti suraqtardy jańa sapalyq deńgeıde sheshýge, sonymen birge, BUU bitimgershilik áleýetin arttyrýǵa jol ashatynyna senim bildirdi.

Otyrysta sondaı-aq Tájikstannyń 2021 jyly UQSHU tóraǵalyǵy, UQSHU aıasynda qol jetkizilgen UQSHU áriptestik mártebesine, Qazaqstanda, Armenıada, Qyrǵyzstanda ótken saılaýlarda UQSHÚ PA atynan qatysqan halyqaralyq baıqaýshylar toby jumystarynyń qorytyndysyna qatysty halyqaralyq kelisimder tóńireginde áńgime órbidi.

UQSHU PA Keńesi Assambleıa qyzmetin uıymdastyrady, onyń quramynda Qazaqstan, Armenıa, Belarýs, Qyrǵyzstan, Reseı jáne Tájikstan elderi parlamentteriniń basshylary bar.